De feanbaas hie net allinne minsken yn tsjinst om turf te meitsjen, mar hy hie ek in eigen winkel, dêr’t dyselde minsken boadskippen dwaan moasten. Sjut hie dêr yn har libben ek in winkeltsje.

Yn it âlderwetske winkeltsje út beppe har tiid kinne jo no snobbersguod keapje. It âlde winkeltsje is noch orizjineel ynrjochte. Der is hannelswaar útstald, dat eartiids yn in doarpswinkeltsje te krijen wie.

Yn de sydkeamer, oarspronklik in stâl foar fee, stiet in unike samling turfsnijwurk, makke troch Jan Weima (Jan Potschipper ) út Aldegea (Sm).
Dizze yn 1943 ferstoarne keunstner snie bibelske foarstellings út lange turf. Ek hat er inkelde aardige dingen makke út bonken.

Pieter Tibbesma

Der is yn dizze romte ek in lytse útstalling makke fan de eksintrike âld ynwenner fan Earnewâld en buorman fan Jan en Sjut, Pieter Tibbesma. Pieter waard berne yn 1910 en stoar 30 desimber 2001.

Yn de tredde keamer stiet âld ark útstald, lykas dat brûkt waard troch feanarbeiders, fiskers, reidsnijers en boeren. Yn de bedsteden fine jo âld waskersark, âlde huodden (fan Sjut) en âlde kleantsjes (fan har bern).

Yn dizze keamer hat oant 1903 Cornelis Frederik Helffrich wenne, yn de folksmûle bekend as "de duvel fan Earnewâld" (de duivel van Earnewâld). Hy wie potskipper en krûdesiker.